Гувернерот на Њујорк Ендру Куомо соопшти дека околу 100 деца во сојузната држава се борат со „ретка болест“ за која се верува дека е поврзана со новиот коронавирус.
Станува збор за „педијатриски воспалителен синдром што напаѓа повеќе системи“ и се карактеризира со повеќе различни симптоми и предизвикува животозагрозувачко воспаление на виталните органи.
Куомо рече дека досега во Њујорк се регистрирани три смртни случаи поврзани со болеста, а повеќе од половина од случаите на овој синдром во Њујорк, или 57%, се кај деца на возраст од 5 до 14 години.
Куомо ја потврди смртта на петгодишно дете позитивно на коронавирус и додаде дека здравствените власти истражуваат уште 73 слични случаи низ Њујорк, во кои децата имаат симптоми слични на болеста Кавасаки и синдромот на токсичен шок.
„Ова е екстремно ретко и досега беше непозната манифестација на COVID-19 кај децата“, рече Куомо.
Во 11 американски сојузни држави се пријавени вакви случаи.
Кон крајот на април, британски лекари пријавија дека забележале нагло зголемување на бројот на деца примени на интензивна нега со сериозен „воспалителен синдром“ што може да се поврзе со коронавирус.
Британската национална здравствена служба тогаш рече дека „во последните три недели се забележува очигледно зголемување на бројот на деца и млади кои покажале мултисистемска воспалителна состојба за која е потребна интензивна нега“ и препорачаа лекарите да ги следат случаите со посебно внимание. Погодените деца имаат болки во стомакот, воспаление на срцето и гастроинтестинални симптоми како што се повраќање и дијареја.
Педијатри од болницата Сент Мери велат дека италијански и шпански лекари исто така пријавиле случаи на болни деца со исти симптоми.
