Tesla соопшти дека примил нови резервации за електричниот камион-шлепер кој го претстави кон средината на ноември. Pepsi стана првиот купец кој порачал троцифрен број на возила, бидејќи уплатил депозит за набавка на 100 камиони Tesla Semi.
Досега, најголемата поединечна нарачка изнесуваше 50 возила, а купец беше корпорацијата Sysco, која се занимава со дистрибуција на храна.
Tesla не соопшти колку вкупно камиони досега се порачани, по нешто помалку од еден месец од премиерата, но се претпоставува дека станува збор за неколку стотици, ако не и илјада возила, а бројот на резервации се менува од ден во ден.
Кога станува збор за Pepsi, оваа компанија во САД моментално поседува речиси 10.000 камиони, па со купувањето на овие 100 возила од Tesla, еден процент од флотата ќе и биде на електричен погон.
Инаку, годишно во САД се продаваат околу 260.000 камиони од класата која и припаѓа на Tesla Semi.
Основната верзија на камионот на Tesla на струја има автономија во возењето од 480 километри и чини 150.000 долари.
За оние на кои и е потребен камион за нешто подолги релации, на располагање е Tesla Semi кој со полни батерии може да помине до 800 километри.
Оваа верзија се продава по цена од 180.000 долари. За да се резервира основниот модел, потенцијалните купувачи мораат да уплатат депозит од 20.000 долари.