Настапот на „Марун 5“ на Супербоул беше прогласен за еден од најздодевните на сите времиња и корисниците на социјалните мрежи не престанаа да се шегуваат на сметка на разголениот фронтмен Адам Левин.
Но, се чини дека ни Левин, ни останатите членови на бендот не се многу разочарани, особено поради фактот дека по настапот на кој ги изведоа нивните најголеми хитови, а тој го покажа совршено вајаното тело, продажбата на нивната музика вртоглаво порасна а 488%.
Според Billboard, покачувањето на продажбата особено се должи на заинтересираноста за хитовите што бендот ги изведе на сцена: „Harder to Breathe“, „This Love“, „Girls Like You“, „She Will Be Loved“, „Sugar“ и „Moves Like Jagger“, чија продажба се зголемила за неверојатни 587 проценти.
Во меѓувреме, Левин се огласи и за критиките за настапот, од кои дел отидоа до таму што изведбата беше прогласена и за „најлошата во историјата на Супербоул“.
„Му благодариме на универзумот што ни ја даде оваа неверојатна можност да настапиме на најголемата сцена на светот. Им благодариме на нашите обожаватели кои ни го овозможија тоа. И им благодариме на нашите критичари кои нѐ туркаат да бидеме уште подобри“, напиша Левин на Instagram.