Израелската влада рано утринава го разреши шефот на домашната разузнавачка служба Шин Бет, а одлуката стапи на сила на 10 април, соопшти кабинетот на премиерот Бенјамин Нетанјаху, по тридневните протести против најавениот потег.
Нетанјаху оваа недела изјави дека ја изгубил довербата во Ронен Бар, кој ја водеше Шин Бет од 2021 година, и дека има намера да го отстрани.
Бар не присуствуваше на владиниот состанок, но во писмото испратено до министрите рече дека процесот околу неговото разрешување не е во согласност со правилата и дека неговото разрешување се заснова на неосновани тврдења.
Полицијата вчера употреби водени топови и изврши бројни апсења додека избија судири за време на протестите во Тел Авив и во близина на резиденцијата на премиерот во Ерусалим. Во текот на изминатите три дена, демонстрантите за разрешување на Бар ги здружија силите со демонстрантите против одлуката за продолжување на војната во Појасот Газа.
Одлуката на израелската влада уследи по неколкумесечните тензии меѓу Бар и Нетанјаху поради истрагата за корупција на помошник во неговата канцеларија. Нетанјаху смета дека истрагата е политички мотивиран напад и обид да се собори од власт, додека критичарите го обвинуваат дека ги поткопува демократските институции барајќи смена на Бар.
Во писмото до владата, Бар рече дека одлуката за негово разрешување е „целосно обележана со (...) конфликт на интереси“ и водена од „фундаментално неприфатливи мотиви“.
Тој веќе најави дека има намера предвреме да се повлече од функцијата за да ја преземе одговорноста за неуспесите на разузнавачките служби што спречија напад на палестинската милитантна група Хамас врз Израел во октомври 2023 година.
