Канадските научници развија сензор кој детектира кога децата се оставени сами во автомобилот, а потоа се активира алармот.
Сензорот ја користи технологијата која се користи за радари и вештачката интелигенција за активирање аларм кога децата подолго време се оставени во автомобилот.
Тимот кој го направи овој сензор тврди дека работи со сто процентна прецизност.
Сензорот е со големина од 2,5 сантиметри, а ќе се вгради на ретровизорот. Неговите сигнали ќе се рефлектираат на децата во автомобилот, а вештачката интелигенција ќе ја анализира ситуацијата и ќе востанови дали е потребно да се активира алармот, велат научниците од Универзитетот Ватерло во Канада.
Тие истакнаа дека сензорот ќе спречи за да се заклучат вратите на автомобилот, а кога ќе се активира ќе биде доволно гласен да ги предупреди луѓето и возачите кои се наоѓаат во близина.
Овој сензор го решава проблемот кој е присутен на глобално ниво. Системот е евтин и достапен, па може да стане и дел од стандардната опрема во сите автомобили.
„За разлика од камерите, сензорот не ја загрозува приватноста. Тој продира преку седиштата и го детектира детето“, додаваат научниците.
Секоја година, во САД умираат најмалку 37 деца заборавени во автомобили, а оваа година се забележани дури 52 вакви случаи. Да се потсетиме дека летово и во Скопје, деца се оставени сами во автомобил на паркинг во скопската населба Ново Лисиче. Полицијата по реакција на граѓани ги извади од возилото и тие беа однесени во Клиничкиот центар во Скопје. За среќа, децата беа во добра здравствена состојба.
Сензорот ќе се најде на пазарот кон крајот на 2020 година.
