Без победник заврши првиот полуфинален дуел кој синоќа се одигра во Мадрид, а мала предност има Челси поради голот постигнат на гости.
Првата сериозна шанса ја имаше Тимо Вернер чиј зицер голманот Тибо Куртоа успешно го одбрани.
Челси сепак прв поведе. Американецот Кристијан Пулишиќ во 14. минута го отвори резултатот кога го издрибла белгискиот голман и ја смести топката во домашната мрежата и покрај двајцата играчи кои стоеја на гол-линијата.
Пороен дожд потоа се појави од небото над Мадрид, кој очигледно повеќе им донесе среќа на домашните бидејќи во 29. минута Карим Бензема одлично се снајде во гостинскиот шестнаесетник и со атрактивен удар заби во англиската мрежа.
Во вториот дел дождот стивна, но замреа и шансите на „Алфредо ди Стефано“ стадионот во Мадрид и натпреварот заврши со оние два гола од првите 45 минути.
Реваншот помеѓу овие два тима е закажан за 5 мај (среда) од 21 часот на „Стемфорд Бриџ“ во Лондон каде дефинитивно ќе биде познат овосезонскиот финалист.
Вечерва се игра и вториот полуфинален дуел од 21 часот на „Парк де Пренс“ во Париз каде ПСЖ ќе го пречека Манчестер Сити.