Иако е неизбежен дел од шампионската генерација на Реал Мадрид која беше доминантна во Европа во последните пет години, Марсело веќе некое време е центар на шпекулации за заминување од клубот. Шпанскиот гигант повеќе нема да му дава толку голема улога на Бразилецот, па затоа смисли одличен начин да ја реши неговата иднина.
Марсело беше дел од освојувањето на четири трофеи од Лигата на шампионите во изминатите пет години, но со заминувањето на Кристијано Роналдо, полека почна да се распаѓа „старата гарда“ во тимот и Бразилецот сѐ почесто се наоѓаше на клупата отколку во првата постава.
Левиот бек на Олимпик Лион, Ферланд Менди, е многу блиску до премин во Реал Мадрид, а неговиот трансфер ја загрозува позицијата на Марсело во тимот. Доколку Бразилецот реши да остане, ќе добие споредна улога, пишува шпанскиот весник Marca.
Поради овие причини, раководството на клубот му даде до знаење на Марсело дека тој има право сам да одлучува за неговата иднина и дека може да одбере дали ќе остане во Мадрид или пак ќе бара ангажман во некој друг клуб, во кој ќе добие поголема минутажа.
За услугите на Марсело е силно заинтересиран Јувентус, кој би сакал да го засили тимот со овој бразилски репрезентативец бидејќи Алекс Сандро, актуелниот првотимец на левата бековска позиција, би можел да си замине од клубот. Кристијано Роналдо и Марсело се многу блиски пријатели, па Португалецот би можел да има клучна улога во потенцијалниот трансфер.