Поединечни британски медиуми пренесуваат дека Реал Мадрид на крајот од актуелната сезона планира да понуди околу 90 милиони евра за фудбалерот на Манчестер Јунајтед Ентони Марсијал.
Откако ја загуби трката со ПСЖ за потписот на Килијан Мбапе, Реал сега го посакува Марсијал.
Тренерот на „Кралевите“ Зинедин Зидан верува дека неговиот 21-годишен сонародник Марсијал би можел да се прокламира во светска ѕвезда, односно дека совршено се вклопува во неговата визија.
Португалецот Кристијано Роналдо во февруари полни 33 години, Карим Бензема 30 во декември, 32 – годишниот Лука Модриќ, како и Герет Бејл се почесто имаат проблеми со повредите, па Зидан во својот тим сака да вметне младост и брзина. Тој смета дека Марсијал е ѕвезда која може да го води Реал во иднина.
Францускиот фудбалер е во форма оваа сезона, има голема самодоверба, постигна седум погодоци во 18 натпревари за Јунајтед оваа сезона, но местото во првиот тим се уште не му е загарантирано.
Тој често своите должности на теренот ги дели со напаѓачот Маркус Рашфорд.
Мурињо бара повеќе од Марсијал, а играчот покажува квалитети со кои може да стане најдобар од сите напаѓачи во клубот.
Интересот на Реал нема веднаш да внесе паника во редовите на клубот од „Олд Трафорд“, бидејќи Марсијал потпиша четиригодишен договор со опција за продолжување на соработката на уште една сезона, кога во 2015 година пристигна од Монако за околу 65 милиони евра, но намерата Реал да доведе големи засилувања следната сезона е секако загрижувачка.