Доминиканскиот напаѓач е единствениот играч на „Кралевите“ кој на синоќешните тестови излегол позитивен.
Самиот клуб ја потврди оваа вест на клупската веб-страница. Реал Мадрид ги почна подготовките за последната мисија од оваа веќе предолга сезона, а тоа е Лигата на шампионите.
По тој повод синоќа сите фудбалери и стручниот штаб беа подложени на тестови за коронавирусот, а резултатите денес обелоденија само еден позитивен и тоа Доминиканецот Маријано Дијас.
Поради позитивниот тест, Дијас веднаш бил сместен во домашна самоизолација.
„Играчот е со одлично здравје и соработува со надлежните кога станува збор за почитувањето на протоколот“, соопштија од клубот.
„Се чувствувам одлично, фала му на Бога моето семејство и околината се исто така одлични. Сега се опоравувам дома и се надевам дека наскоро ќе се вратам во нормала и ќе бидам со моите соиграчи. Поздрав до сите“, изјави Маријано во стори на неговиот Instagram профил.
Со оглед на 14-дневниот карантин, Маријано Дијас отпаѓа од тимот за пресметката со Манчестер Сити во Лигата на шампиони на 7 август на „Итихад“. Тимот на Зидан брка негатина од 1:2 од првиот натпревар во Мадрид.