Реал Мадрид летово за 298 милиони евра, без пресметани бонуси, ги донесе Еден Азар, Лука Јовиќ, Едер Милитао, Ферланд Менди и Родриго Гоес, но мора да собере уште пари за да ги „испегла“ бројките.
„Кралскиот клуб“ мора и да продава играчи за да собере повеќе од 250 милиони евра, па така прв низ вратата излезе Маркос Љоренте кој замина во Атлетико за 30 милиони евра, а со една нога низ врата е Матео Ковачиќ кој треба да премине во Челси за 45 милиони евра.
Трансферот на Раул де Томас во Бенфика наводно наскоро ќе биде официјален, а ќе „тежи“ 20 милиони евра, а според најновите информации, францускиот бек Тео Ернандес можно е да премине во Милан за истата сума.
На тој начин Реал ќе заработи 115 милиони евра, а кон таа сума се очекува да се надоврзе и трансферот на Хамес Родригес кој наводно ќе замине во Наполи за 50 милиони евра.
На трансфер-листата се наоѓаат и Кејлор Навас, Иско, Лукас Васкез, Марко Асенсио и Гарет Бејл, а Флорентино Перес стави вето на продажбата на Дани Себаљос.
Реал на драго срце би го продал Бејл, за кого бара меѓу 80 и 100 милиони евра, но Велшанецот очигледно не се брза да си замине и ја одбива самата помисла за самоиницијативно заминување од клубот. Напротив, тој дава сигнали дека е подготвен да седи на клупа до крајот на договорот.