„Кралскиот“ клуб е освојувач на шпанскиот Суперкуп откако синоќа во Саудиска Арабија дури по изведувањето на пеналите го победи градскиот ривал Атлетико.
Реал имаше повеќе од играта и создаде дупло повеќе прилики за гол од противникот, но дури и по продолженијата двапати од по 15 минути мрежите на Тибо Куртоа и Јан Облак мируваа.
Победникот се реши со изведување на пенали. Карвахал, Родриго, Модриќ и Рамос беа прецизни за Реал, додека за Атлетико прво Саул ја погоди левата статива, а потоа Куртоа го одбрани ударот на Томас. Трипие реализираше во третата серија за потоа Рамос да го погоди решавачкиот удар.
Финалето, како и двата полуфинални натпревара, се играа на „Крал Абдула“ стадионот во Џеда, Саудиска Арабија.
За Реал ова е 11-та титула во Суперкупот, додека Атлетико по петти пат губи. Најтрофејна останува Барселона во 13 титули.