И комбинираниот состав на Зидан не смееше да си дозволи бламажа, особено имајќи го предвид рангот на противникот.
Заврши авантурата на Реал Мадрид во Копа дел Реј. Третолигашот Алкојано се покажа тврд орев за комбинираниот тим на Зинедин Зидан, кој дури и со влегувањето во игра на првотимците успеа да загуби.
Мадриѓаните поведоа во последната минута од првото полувреме кога Едер Милитау погоди за водство. По паузата се очекуваше Реал да го зацементира пласманот, но студен туш се случи на десет минути пред крајот кога Хосе Солбес ја затресе мрежата на украинскиот голман Андриј Лунин кого Зидан го постави помеѓу стативите за овој натпревар.
За да се добие победник натпреварот замина во продолженија. Во игра веќе влегоа Карим Бензема, Марко Асенсио, Еден Азар и Тони Крос кои требаше да ја донесат победата.
Во 110. минута се чинеше патот кон победа е и тоа како отворен откако домашниот играч Рамон Лопес поради втор жолт картон мораше предвреме да се упати кон соблекувалните. Но, пет минути подоцна, Алкојано и со играч помалку постигна победнички гол преку 30-годишниот Хуанан Касанова, за кого овој гол веројатно е врв во неговата кариера.
Алкојано е изненадувањето кое обезбеди пласман во осминафиналето каде веќе се Реал Сосиедад, Ваљадолид, Навалкарнеро, Гранада, Алмерија, Севиља, Валенсија, Жирона, Бетис, Осасуна, Леванте, Рајо Ваљекано и Виљареал.
Кралскиот клуб нема триумф во ова натпреварување од сезоната 2013/14 кога и последен пат стигна до финалето.
