„Кралевите“ со реми без голови на гости кај Реал Сосиедад ја почнаа новата сезона во Шпанија.
Реал Мадрид гостуваше во Сан Себастијан во Баскија во првото коло од новата сезона во Ла Лига. Походот кон одбраната на титулата го почна неславно играјќи 0:0 со Реал Сосиедад.
Зинедин Зидан не можеше да смета на повредените Еден Азар, Марко Асенсио, Иско и Лукас Васкес, па во првите единаесет играше со Родриго, Мартин Одергард и Жуниор Винисиус зад голгетерот Карим Бензема кој не ја почна сезоната со гол.
Реал повеќе напаѓаше, но ударите на гостите или завршуваа вон рамките на голот или беа успешно блокирани од домашните играчи.
Најсериозната шанса ја имаа домаќините кога во 43. минута Александер Исак излезе еден на еден со Тибо Куртоа, но мадридскиот голман го прочита неговиот удар.