Анде Јанков е роден на 5 јуни 1988 година во Велес. Своето образование го завршува на Економскиот факултет во Скопје. Уште од најрана возраст покажува голем интерес кон пишаниот збор, истовремено читајќи многу книги и пишувајќи кратки раскази. „Едно лето на Крит" е неговиот прв роман, кој е награден на конкурсот „Романијада", објавен од издавачката куќа „Култура". Во моментов го пишува својот втор роман.
Романот првенче на Анде Јанков е една возбудлива приказна, која повеќе наликува на филмско сценарио. Ја читате и имате чувство дека сте таму, постојано во исчекување на она што следи. И иако насловот е „Едно лето на Крит”, сосема слободно би го променила во „Еден ден на Крит”. Затоа што овој роман е токму тоа, роман за еден ден и роман што се чита во еден ден.
Забавен, модерен, сликовит, романтичен, мириса на младост и море. А сепак, на моменти напнат, понекогаш предизвикува морници, а понекогаш наивно потсетува на љубов. И ако треба да одредам кое е чувството што го движи дејството напред се двоумам дали прво да го споменам стравот или на прво место да ја ставам љубовта. Затоа што во овој роман стравот и љубовта меѓусебно се испреплетуваат.
Ова е приказна од нашето секојдневие. Наменета е за еден широк дијапазон на публика. Во неа дефинитивно ќе се пронајдат тинејџерите, но интересна е и за повозрасниот аудиториум. Јазикот на кој е напишана е флуентен и разбирлив, настаните се прецизни и сосема јасни, а сонот мајсторски ја предвидува реалноста. Главните ликови Марина и Филип потекнуваат од Скопје. Речиси целото дејство се одвива во Грција, поточно на островот Крит, каде тие еден убав сончев ден заминуваат на летување. И она што треба да биде приказна за едно романтично летување одеднаш преминува во трилер филм.
Киднапирање, трговија со луѓе, обид за убиство, сообраќајна незгода... И сè поради еден обичен каприц, една наивна караница. Токму така, сосема случајно, како што впрочем и секогаш се случува. Прашањата – како? Можеше ли да биде поинаку? – остануваат во романот, како и во животот, без одговор.
Ова не е приказна што трае со години. Ова е роман за еден ден. Ден – изненадување. Ден – поинаков од сите други. Ден кој отскокнува од секојдневието. Ден за созревање. Ден во кој нема време за погрешни одлуки. Нема каење. Да се биде или не. Ден – миг. Ден – вечност. Ден кој не менува засекогаш. Ден полн неизвесност.
Страв и љубов. Љубов и страв.
Ден за кој мислиме дека секогаш му се случува на некој друг, а никогаш нам. И каков исход ќе има зависи од тоа како ќе го одиграме мигот, затоа што повеќе време – нема.
Ова е роман што се чита во еден здив. Во еден ден – ден што може да ни се случи и нам. Дали и Вие имате некој таков ден?
Ирена Димов, во соработка со Култура