Кој може да оддолее на меки, вкусни полнети палачинки? Овој феноменален рецепт за солени палачинки филувани со пилешко месо и печурки е идеален за секој оброк во денот, а за негова подготовка нема да ви треба многу време.
Најдобро од сѐ е што може да ги подготвите и ден претходно и потоа да ги испечете наредниот ден или само да ги загреете во рерна или микробранова печка.
За палачинки:
150 гр брашно
1 јајце
3 грама сол
2 супени лажици масло
200 мл млеко
300 мл минерална газирана вода
2 гр сода бикарбона
За фил:
250 гр бело пилешко месо
200 гр печурки
1 домат
1 страк праз
Бибер по вкус
20 гр путер
2 лажици брашно
400 мл млеко
Подготовка:
Во длабок сад изматете ги јајцата, солта и маслото, а потоа постепено додавајте ги брашното, па млекото и водата, о постојано мешање и внимавајте да не се направат грутки. На крајот во смесата додадете сода бикарбона. Печете ги палачинките на добро загреана тава, 2-3 минути од едната и потоа околу 1 минута од другата страна.
Пилешкото месо исечете го на коцки и динстајте го на малку масло, а потоа додадете ги исечените печурки и празот. Зачинете по вкус.
Во посебен сад растопете го путерот, додадете го брашното, лесно промешајте и додадете млеко додека не ја постигнете саканата густина. Сосот динстајте го 7-8 минути. Половина од сосот додадете го во пилешкото и печурките и со смесата филувајте ги палачинките. Филуваните палачинки наредете ги во подмачкан плех. Откако ќе го наредите целиот плех, полејте ги палачинките со останатиот сос и озгора наредете парчиња домат. Печете во рерна загреана на 220 степени Целзиусови околу 15 минути.
