Печен крап во бело вино е совршено посно јадење за Свети Никола, но и одличен предлог за новогодишната ноќ.
Доколку не ви треба за некој посен празник, само заменете го посниот маргарин со обичен.
Потребни состојки:
- 3 кг крап
- 200 гр посен маргарин
- 6 големи кромиди
- 2-3 лимони
- зрна бибер
- листови ловор
- рака магдонос
- 500 мл бело вино
- 1 лажица сол
Подготовка:
Загрејте ја рерната на 190 степени. Измијте ја рибата, па исушете ја. Ако работите со цел крап, исечете ја рибата од врвот до дното во филе во форма на потковица. Кромидот ситно исечкајте го и посипете го на плехот за печење. Врз кромидот ставете ги филетите од крап и посолете.
На секое филе ставете парче лимон, две до три зрна бибер и по еден ловоров лист. Исечкајте свеж магдонос и обилно посипете го преку филето. После тоа, исечете го маргаринот и ставете го на секое филе. На крајот истурете бело вино во тавата да го покрие дното, но не и филетите. За посилен вкус на виното, можете лесно да го посипете врз филетите.
Покријте го плехот и оставете го да отстои најмалку еден час на ладно место, па печете во загреана рерна околу 50 минути додека не порумени.
