Растот на бројките не помина незабележан во регионалните медиуми кои пишуваат за состојбата со коронавирусот во земјава, имајќи предвид дека се планира отворање на границите.
Вкупниот број на заболени со коронавирусот во Република Северна Македонија изнесува 2.315, а тестирани се речиси 30.000 граѓани. Ако продолжи да расте бројот на новозаболени во следниве денови, се размислува и за воведување на нови рестриктивни мерки во одредени општини. Веќе трет месец е во сила вонредната состојба која беше продолжена до 14 јуни, пренесува Klix.ba од БиХ.
Mondo.rs исто така пишува за „загрижувачкиот раст на бројот на заболени“ во земјава, каде вкупниот број на починати од COVID-19 во изнесува 140.
Српски B92.net нагласува дека премиерот на Северна Македонија, Оливер Спасовски, вторпат е во самоизолација од почетокот на пандемијата, иако тестот што го направи денеска е негативен. Тој соопшти дека ќе остане во домашна самоизолација додека не добие официјални препораки од епидемиолозите.
Спасовски денеска беше тестиран откако вчера беше на состанок во Куманово со Сања Лукаревска, директорката на УЈП, која е потврдено дека е позитивна на коронавирусот.