Двата дена пауза помеѓу регуларната сезона и плејофот во НБА лигата се доволни за да се направат клучни промени, посебно кај тимовите кои не обезбедија учество во плејофот. Владе Дивац го повлече првиот потег, отпуштајќи го досегашниот тренер на Сакраменто Кингс, а по него уште неколку клуба се решија за промени.
Дејв Јергер беше отпуштен од тренерската позиција во Сакраменто Кингс, откако тимот ја имаше најдобрата сезона во последната деценија. Младото јадро од играчи во Кингс од наредната сезона ќе биде предводено од друг тренер – веројатно некој кој повеќе ќе одговара на амбициите на тимот.
По неполни две сезони на клупата на Мемфис Гризлис, отказ доби и Џеј Би Бикерстаф. Неговиот договор беше предвремено прекинат поради тоа што клубот реши да тргне во различна насока откако го трејдуваше Марк Гасол.
Отпуштен беше и тренерот на Кливленд Кавалирс, Лери Дру. Тој и онака ја презема тренерската позиција како исполнувач на должноста до крајот на сезоната, така што неговото отпуштање и не е така изненадувачко. По четири последователни финалиња, тимот го напушти Леброн Џејмс и Дру успеа да ги одведе до катастрофален скор од 19-63 во регуларната сезона.
Тројца од 14-те тренери на тимовите кои испаднаа веќе се отпуштени, а којзнае уште колку ќе добијат отказ до крај на овој месец. Во Феникс Санс веќе е закажан состанок на кој ќе се разгледува дали Игор Кокошков ќе биде задржан како тренер, Лук Волтон е на излезна врата од Лејкерс, додека на удар е и Скот Брук, кој си го ризикуваше местото со последните две лоши сезони во Вашингтон Визардс.