Компанијата Meta е казнета со рекордна сума од 1,2 милијарди евра од Ирската комисија за заштита на податоци, водечката европска агенција која ја регулира работата на компанијата.
Ова е најголемата казна досега изречена според Општата регулатива за заштита на податоците (ГДПР) и е епилог на истрагата што трае речиси три години, од август 2020 година.
Компанијата Meta доби рок од шест месеци, кој започнува во моментот на добивање на решението, да го запре преносот и обработката на податоците на граѓаните на ЕУ кои живеат во Америка. Ова значи дека податоците мора или да се избришат или да се пренесат на складиште во Европа.
Американскиот правен систем не обезбедува доволна заштита на податоците во согласност со стандардите на ЕУ, поради непропорционалниот и неоспорен пристап што го имаат разузнавачките агенции.
Во декември, Комисијата усвои нацрт-одлука за Рамката за приватност на податоците ЕУ-САД, која треба да биде усвоена до крајот на годината за регулирање на трансатлантските трансфери на податоци.
Прашање е дали Meta ќе може да го одложи прекинот на преносот на податоци до стапување во сила на новата рамка. Meta рече дека Facebook платформата во Европа нема да биде „веднаш засегната од одлуката“, но дека ќе поднесе жалба.
Претходната рекордна казна ја доби Amazon, а таа изнесуваше 746 милиони евра. Казната што ја доби компанијата Meta од 1,2 милијарди евра е апсолутно најголемата сума изречена како казна според регулативата ГДПР.
„Основниот судир на законите меѓу американската влада и нејзините правила за пристап до податоците, како и правата за приватност на податоците на Европејците, се во основата на ова прашање. Тоа е конфликт што ниту Meta, ниту која било друга компанија не можат да го решат независно“, соопшти компанијата Meta.
„Поради ова сме длабоко разочарани, затоа што сме единствените под напад на истите правни механизми, додека илјадници други компании обезбедуваат услуги во Европа“, се додава во соопштението.
Иако висината на казната е рекордна, тоа не е прва санкција наметната за пренос на податоци во Америка од страна на големи технолошки компании. Минатата година Италија и Франција ѝ се придружија на Австрија во забраната за користење на услугите на Google Analytics. И во април оваа година, австриското регулаторно тело заклучи дека Facebook Pixel е во спротивност со законот и прописите за ГДПР.
