Компанијата Apple смета дека рекордната продажба и профитот во кварталот што ги опфати божикните празници се должи на огромната побарувачка за моделот iPhone 11.
Шефот на технолошкиот гигант, Тим Кук, исто така изјави дека „будно го следат“ развојот на епидемијата на корона вирусот, што ги отежнува обидите за прогнозирање на профитот во следниот квартал.
Компанијата го намали работното време и го ограничи патувањето на вработените во Кина, додека фабриките на добавувачите на делови во земјата и понатаму се затворени поради епидемијата.
Apple пријави дека продажбата во трите последни месеци од 2019 година се зголемила за 8% во однос на истиот квартал во 2018 година, на 91,8 милијарди долари, додека нето профитот се зголемил за 11% на 22,2 милијарди долари.
Ваквите бројки се смета дека се должат на побарувачката за моделите iPhone и други уреди како паметните рачни часовници и AirPod уреди.
Во овој квартал Apple заработи околу 79 милијарди долари од производи и околу 12,7 милијарди долари од услуги како Apple Pay, новиот стриминг сервис Apple TV+, гејмерскиот сервис Apple Arcade и App store.
Вкупните резултати ги надминаа очекувањата на Волстрит и вредноста на акциите на компанијата се зголеми за 3%.
Најголем раст компанијата забележала во Европа, каде продажбата се зголемила за 14% во последниот квартал од 2019 година.