Поранешниот италијански гигант Милан постојано работи со загуба во последните неколку години, а оваа година постави нова рекордна загуба од дури 126 милиони евра. Новите сопственици се ставени во незгодна ситуација откако поранешните сопственици не можеа да ги исплатат нивните долгови и ќе мораат да бидат многу претпазливи со финансиското работење во иднина.
Последните извештаи велат дека Милан заработил 53 милиони евра помалку во однос на минатата година, со што вкупните загуби во периодот од последните 14 години го донесе на преку 730 милиони евра, од кои 460 милиони се акумулирани во текот на минатите пет години.
Сепак, не е сѐ црно во Милано. Извештајот кој беше објавен неколку месеци претходно сведочи за загуба од само 22,3 милиони евра загуба во првата половина од годината, наспроти 39,3-милионската загуба забележана во истиот период минатата година.
Оттогаш Милан доби нови сопственици во американскиот хеџфанд Elliot, кој ја презема контролата над клубот откако поранешниот сопственик Ли Јонгхонг го надмина рокот за исплата на кредитот кој неговата компанија го зема со цел да го комплетира преземањето на клубот од Силвио Берлускони.
Elliot направи многу измени во раководството на клубот откако го презема клубот. Дел од раководството сега се клупските легенди Паоло Малдини и Леонардо, а последната измена беше направена на местото извршен директор на клубот, каде сега се наоѓа поранешниот директор на Арсенал, Иван Газидис.
