Арсенал ја освои титулата во ФА купот, откако во финалето на „Вембли“ го победи шампионот Челзи со 2:1.
Екипата на Арсенал со оваа титула барем малку успеа да ја спаси сезоната, во која низ Премиер лигата не успеа да избори пласман во Лигата на шампионите. Од друга страна Челзи не успеа да ја освои двојната круна, бидејќи сезонава ја освои шампионската титула.
Арсенал до предност дојде во раната фаза на натпреварот, во четвртата минута Алексис Санчез го совлада Куртоа. Чилеанецот налета на топката, впечатокот е дека ја прими со рака пред да го постигне голот, но откако се консултираше со помошникот, судијата Ентони Тејлор го призна голот.
Челзи во второто полувртеме, во 68 минута, остана со играч помалку поради исклучувањето на Мосес.
Диего Коста во 76 минута од работ на шеснаесетникот го совлада Оспина. Арсенал возврати три минути подоцна кога по нафрлувањето на Жиру, ударот на Ремзи со глава заврши зад грбот на Куртоа.
„Тобџиите“ со победата во финалето го освоија 13 трофеј во ФА купот, со што станаа апосолутни рекордери. Менаџерот на тимот Арсен Венгер стигна до седмата титула во ФА купот, трета во последните четири сезони.
