На глобалните берзи цените на нафтата пораснаа и минатата недела, вторпат по ред, достигнувајќи ги највисоките нивоа годинава бидејќи најголемите светски производители решија да го задржат намаленото производство.
На лондонскиот пазар цената на барелот минатата недела порасна за 2,4 отсто, на 90,65 долари, што е највисоко ниво од ноември минатата година.
На американскиот пазар, пак, барелот поскапе за 2,9 отсто, на 87,50 долари, што е највисоко ниво од септември минатата година. Порастот на цените втора недела по ред е резултат на одлуките на Саудиска Арабија и Русија за намалување на производството. Саудиска Арабија минатата недела објави дека ќе го намали производството за 1 милион барели дневно до крајот на годината, што ги изненади трговците кои очекуваа дека ќе ја продолжи одлуката за намалување на понудата само до крајот на октомври.
Од друга страна, Русија одлучи да го намали извозот за 300.000 барели дневно до крајот на годината. Со намалување на производството, овие земји се обидуваат да одржат покачени цени на нафтата, имајќи предвид дека побарувачката слабее поради забавувањето на растот на најголемите светски економии.
Трговците се надеваа на поголема побарувачка од Кина, откако беа укинати рестриктивните мерки за коронавирус на почетокот на годината. Сепак, закрепнувањето на втората по големина светска економија од кризата со корона е многу побавно од очекуваното. Забавува и растот на западните економии, бидејќи централните банки веќе година и пол ги зголемуваат каматните стапки со цел да ја потиснат инфлацијата.
Јасно е, велат аналитичарите, дека поради ова се очекува дополнително слабеење на побарувачката на нафта, па затоа се разбирливи одлуките за намалување на производството на најголемите светски производители за да се поддржат цените.
По растот две недели по ред, цените на нафтата се повисоки отколку што беа на почетокот на годината. Во однос на почетокот на годината, цената на барелот на лондонскиот пазар поскапе за повеќе од 5 отсто, а на американскиот пазар за речиси 9 отсто.
