Најлегендарниот модел на Renault се враќа со стил.
Како што веќе беше најавено, Renault по „петката“ реши да ја оживее легендарната „четворка“. Иако многумина ја сметаа првата генерација на Kangoo како враќање на Renault 4, вистинската реинкарнација на моделот ќе се случи дури сега.
Поточно, тоа ќе се случи на 17 октомври, кога Renault на 89-тиот салон за автомобили во Париз ќе го претстави концепт моделот базиран на оригиналниот R4.
Од Renault засега се таинствени, па само откриваат како тимот дизајнери собран под водство на Жил Видал, потпретседател на одделот за дизајн на Renault, го смислил концепт автомобилот.
Се одбележува и 25-годишнината од хуманитарното рели 4L Trophy, па се смета дека ќе им се допадне и на помладите генерации.
Објавените скици ја откриваат препознатливата силуета на „четворката“ со осветлено задно странично стакло. За разлика од оригиналот, автомобилот сега доаѓа со огромни теренски гуми и носачи на покривот. Судејќи по ова, веројатно се работи за концепт за off-road авантури.
Новиот Renault 5 ќе се појави на пазарот во 2025 година, додека кросовер-ориентираниот R4 најверојатно ќе пристигне после тоа. И додека оригиналот може да се пофали со скромни димензии и слаб, но неуништлив бензински мотор, новиот модел би можело да биде многу покомплексен и модно поосвестен автомобил. Многумина очекуваат автомобил со големина на Duster со електричен погон и релативно висока цена. И веројатно не се далеку од вистината.