Производителите на автомобили Renault и Nissan се согласија да направат измени во нивното 20-годишно партнерство, скицирајќи позначајна улога на јапонската компанија и нејзината инвестиција во новиот бизнис на Renault со електрични возила.
Според тоа, Renault би требало да го намали својот удел во Nissan од околу 43 на 15 проценти. Останатите 28 отсто од акциите на Renault ќе бидат префрлени на францускиот холдинг.
Француската компанија ќе продаде дел од акциите на Nissan, вредни околу 4,1 милијарди долари по сегашната пазарна вредност, во координирана и планирана постапка, под услов трансакцијата да има економска смисла за Renault, соопштија компаниите.
Nissan сега ќе има 15 отсто удел во Renault и обратно, што ќе ѝ овозможи на јапонската компанија да ги користи своите гласачки права, што досега не можеше да го направи. Целта е да се доближат двајцата партнери до еднаква положба.
Nissan и Renault, исто така, ветија дека ќе здружат повеќе ресурси во клучните проекти во Латинска Америка, Индија и Европа, вклучувајќи пазари, возила и технологии. Nissan, исто така, соопшти дека ќе инвестира во новиот бизнис на електрични возила на Renault.
Нерамноправниот однос со Renault долго време е извор на тензија меѓу раководителите на Nissan. Иако пред две децении го спаси Nissan од колапс, Renault продава помалку автомобили.
Денешното заедничко соопштение стави крај на речиси четиримесечните интензивни разговори за кои извори за Reuters изјавија дека биле комплицирани поради прашањето за поделба на интелектуалната сопственост, со оглед на барањата на Renault да се поврзе со други компании.
Renault сигнализираше дека сака да соработува со низа компании, од кинеската Geely Automobile Holdings до производителот на полупроводници Qualcomm.
Преструктуирањето на француско-јапонскиот сојуз е важно за двете компании, но и за глобалната автомобилска индустрија. Исто така, покажува како технолошката промена во автомобилската индустрија ги принудува компаниите да соработуваат и да се натпреваруваат со вртоглав број новодојденци и технолошки компании.
