Се покажа дека мистериозните отпечатоци од „копита“ на морското дно во близина на брегот на Нов Зеланд не ги остави зад себе некое митско суштество, како подводен коњ, туку дека постојат неколку научни објаснувања за овој феномен.
Експертите првпат ги забележале овие чудни траги во 2013 година за време на истражувањето на подморскиот гребен, спроведено од Националниот институт за истражување на водата и атмосферата на Нов Зеланд (NIWA). Ги пронашле на длабочина од 450 метри и долги години не можеле да разберат што можело да ги предизвика.
Сега научниците од NIWA пронајдоа решение кое совршено се вклопува во целата приказна и има рационална позадина зад себе. Имено, овие траги совршено одговараат на предниот дел на главите на еден вид риби. Вдлабнатините во центарот на отпечатоците веројатно се траги од каснување што ги оставиле рибите Coelorinchus за време на хранењето, кога ја собирале калта од дното и го вшмукувале својот плен.
Со оглед на екстремните длабочини на кои овие риби бараат храна, многу е ретко да се најдат такви траги, според NIWA. Всушност, се чини дека до сега не сме го документирале директно процесот на хранење на овие суштества на длабоко море во природната средина, пишува Science Alert.
Судејќи според отпечатоците, експертите на NIWA претпоставуваат дека рибите ловат плен така што со брзо движење ги туркаат главите во калта и потоа го цицаат оброкот со устата. Некои отпечатоци се поплитки од другите и веројатно се направени кога риба зграпчила рак или слично животно на површината на песокот. Подлабоките отпечатоци покажуваат дека понекогаш се обидува да го ископа пленот што се закопал подлабоко.
Во 70-тите, научниците виделе Coelorinchus како „копа“ по калливото морско дно на длабочина од околу 4.000 метри. Тие не разбрале точно зошто тоа го направило, но претпоставувале дека таквото однесување ќе остави одреден вид отпечаток на дното на морето. Кога научниците од NIWA преклопија неколку фотографии од Coelorinchus и подводни траги од „копита“, тие видоа дека облиците се совпаѓаат.
Истражувањето, насловено Rattail lebensspuren: Feeding impressions from deep-sea granadiers, е објавено во списанието Deep Sea Research Part I: Oceanographic Research Paper.
