Мистеријата за смртта на 330 слонови во Боцвана, кои беа пронајдени мртви претходно годинава, конечно е решена.
Боцвана е дом на третина од популацијата на африканските слонови, а во мај и во јуни беа забележани многу починати слонови. Официјалните власти велат дека станува збор за 330 слонови, а причина за смртта е цијанобактерија, токсична бактерија која природно се наоѓа во вода,а некогаш се размножува во голема количина како сино-зелена алга.
Овој заклучок е донесен по повеќемесечно тестирање во специјални лаборатории во Јужна Африка, Канада, Зимбабве и САД.
Повеќето од загинатите слонови се пронајдени во близина на вода. Смртните случаи престанаа да се случуваат по сушењето на локациите од кои слоновите пиеја вода, пренесе BBC.