Додека ја фотографираше површината на Марс, вселенската сонда сними необична глетка. Научниците имаат објаснување.
Дали сега завршија шпекулациите за постоење живот на Марс? Веројатно ова се прашуваа многу корисници на интернет кога почнаа да кружат чудните фотографии направени од сондата Mars Reconnaissance од орбитата на оваа планета.
Сликите направени во близина на северниот пол на Марс покажуваат структури кои силно наликуваат на дрвја. Но, кога научниците ги испитувале фотографиите, направени во 2010 година, откриле дека се работи за оптичка илузија.
Северниот пол на Црвената планета е покриен со вечен мраз направен од замрзнат јаглерод диоксид (т.н. сув мраз), слично како што водениот мраз ги покрива половите на Земјата.
Околу замрзнатиот северен пол на Марс се наоѓа „прстен“ од дини кои наликуваат на песочните дини во пустините на Земјата. Тие се покриени со тенок слој прашина и делови од сув мраз, пишува Space.com. Како што сувиот мраз почнува да се топи во потопли услови, тој го турка темниот базалтен песок на површината на дините.
„Во текот на пролетта на Марс, Сонцето го загрева мразот и предизвикува негово сублимирање директно во пареа, а добиениот гас ги отстранува околните честички од прашина и песок и го изложува темниот базалтен песок“, објасни Кенди Хансен, членка на орбитерот Mars Reconnaissance на НАСА, тим од Универзитетот во Аризона.
Иако овие темни „линии“ нѐ потсетуваат на дрвја, во реалноста тие не се исправени, односно не се „вират“ во воздухот, туку се на земја.
Само нашиот мозок ги толкува на тој начин, бидејќи навистина наликуваат на фотографии од дрвја како што ги знаеме на Земјата.
Што се однесува до дрвјата или друг вид на живот на Марс, до денес нема цврсти докази за било каков тип на марсовска биологија, во минатото или во сегашноста, растение или нешто друго, пишува Space.com.
