Откако американскиот претседател Доналд Трамп изјави дека неговата администрација наскоро ќе објави царини од 25 отсто за увоз на производи од ЕУ, Европската комисија најави дека ќе реагира одлучно и навремено против неоправданите пречки за слободната и фер трговија.
„ЕУ ќе реагира одлучно и веднаш против неоправданите пречки за слободната и фер трговија, вклучително и кога тарифите се користат за да се оспорат законите и недискриминаторните политики“, рече портпаролот на Комисијата како одговор на барањето за коментар за забелешките на Трамп.
Тој нагласи дека ЕУ секогаш ќе ги штити европските компании, работници и потрошувачи од неоправдани царини.
Запрашан на состанокот на американската влада дали одлучил за тарифна стапка за стоки од Европската унија, Трамп одговори дека донеле одлука и дека ќе ја објават многу брзо, а таа ќе биде 25 отсто, генерално кажано, за автомобили и за се останато.
Тој исто така изјави дека ЕУ е основана „за да ги измами САД“.
Како одговор, портпаролот на Комисијата рече дека Европската унија е најголемиот слободен пазар во светот и дека тоа е благодет за Соединетите држави.
Портпаролот истакна дека со создавањето на голем и интегриран единствен пазар, „ЕУ ја олесни трговијата, ги намали трошоците за американските извозници и ги усогласи стандардите и регулативите во 27 земји“.
„Како резултат на тоа, американските инвестиции во Европа се многу профитабилни“, додаде портпаролот.
„Европа се залага за дијалог, отвореност и реципроцитет. Подготвени сме за партнерство доколку играте според правилата. Но, ние исто така ќе ги заштитиме нашите потрошувачи и бизниси на секој чекор. Од нас не очекуваат ништо помалку“, заклучи портпаролот на ЕК.
