Холандските фудбалери беа револтирани од арбитражата по натпреварот против Англија на кој останаа без финалето на Европското првенство, а особено беа лути на пеналот досуден во раната фаза од натпреварот.
Синоќа Англичаните по пресврт ги совладаа Холанѓаните со 2:1. „Оранје“ поведоа во раната фаза од играта, но Хари Кејн многу брзо одговори со гол од белата точка.
Токму овој пенал беше клучната причина за протестот на Холанѓаните. Кејн шутираше од волеј, топката помина над голот, но по упатениот удар беше погоден од невнимателниот Дензел Думфрис со отворен ѓон.
Иако судијата Феликс Цвајер на почетокот не досуди пенал, по интервенција од ВАР ја смени одлуката и поради невнимание му додели жолт картон на Думфрис. Кејн беше сигурен од белата точка.
Репрезентацијата на Холандија по натпреварот не се согласи со одлуката на Цвајер. Капитенот Вирхил ван Дијк ја откри реакцијата на германскиот судија по последниот свиреж.
Ван Дајк откри дека судијата веднаш „избегал“ во соблекувалната, без да се ракува со играчите, што е навистина редок случај во светот на фудбалот.
„Судијата истрча во соблекувалната веднаш по крајот на натпреварот и не се ракуваше со играчите. Мислам дека тоа кажува многу“, откри бесниот Ван Дајк.
Во исто време селекторот на Холандија, Роналд Куман, разочарано изјави дека ВАР го уништува фудбалот.
„Тоа не беше пенал. Единствената желба на Думфрис беше да го блокира ударот, а потоа Кејн шутна и нивните стапала се судрија. Фудбалот е уништен од ваквите одлуки на ВАР. Овој пенал немаше да биде досуден во Англија“, рече Куман.
За потсетување, Англија в недела во финалето на Европското првенство ќе игра против Шпанија. Дуелот во Берлин почнува во 21 часот.
