Стартап компанија разви батерија во цврста состојба погодна за електрични автомобили која може целосно да се наполни за само неколку минути и трае повеќе од двапати подолго од сегашните батерии за електрични возила, пишува Independent.
Откако успешно демонстрираше прототип што може да се полни за само три минути за повеќе од 10.000 циклуси во текот на својот животен век, Adden Energy, дел од Универзитетот Харвард, доби 5,15 милиони долари средства за понатамошен развој на технологијата, со цел да ја комерцијализира во блиска иднина.
Брзиот развој на технологијата за складирање чиста енергија е клучен за борбата против климатските промени, се вели во предлогот на стартапот.
За да се забрза усвојувањето на технологијата, извршниот директор на Adden Energy, Вилијам Фичу се надева дека ќе ги привлече оние 37 проценти од Американците кои немаат свои гаражи и затоа не можат да ги полнат електричните возила преку ноќ дома.
„Целосната електрификација на автомобилите е еден од најзначајните чекори што можеме да ги преземеме во борбата против климатските промени“, рече Фичу.
„Меѓутоа, широкото прифаќање на електрични возила бара батерии кои можат да задоволат различни потреби на потрошувачите.“
Проценките покажуваат дека само електрификацијата на светската флота на возила може да ги намали глобалните емисии на стакленички гасови за 16 проценти, со оваа „нова парадигма на батерии“ која се смета за клучна за постигнување на оваа цел.
„Електричните возила не може да продолжат да бидат луксузен производ и мора да бидат значително повеќе од сегашниот еден процент од автомобилите на патиштата, ако сакаме да се движиме кон иднината на чиста енергија. Исто така, САД нема да имаат пазар на користени автомобили ако батериите на ЕВ траат само 3 до 5 години. Технологијата мора да биде достапна за секого. Не гледаме фундаментални ограничувања за подобрување на технологијата за батерии. Ова може да ја промени целата индустрија“.