Ветеранот не размислува за пензија, тука за евентуално враќање во Германија, но само доколку не го продолжи договорот со клубот од Фиренца.
Сегашноста е јасна, иднината не. Франк Рибери е во центарот на проектот на Фиорентина. На 16-те натпревари сезонава (рачунајќи ја и Копа Италија), тој на дури 14 беше стартер. На свои 37 години сезонава ја почна со одличната асистенција за Федерико Кјеза (пред да замине во Јуве) против Интер, а последен блесок му беше асистенцијата за Горан Влаховиќ против Јувентус. Французинот е главната алка во бледата сезона на Виола.
Неговиот договор со Фиорентина завршува на крајот од сезонава, кога веќе ќе има 38 години (роденден му е во април). Но, тој не размислува за пензија, напротив, не исклучува можност да се врати во Бундеслигата.
„Во моментов мислам само на Фиорентина, јас сум важен дел од тимот. Но, доколку заврши мојата авантура тука, не исклучувам можност да се вратам во Бундеслигата. Не сакам ништо да исклучам“, вели Рибери говорејќи за германски Bild.
Тој 12 сезони ги бранеше боите на Баерн пред да се пресели во градот на Данте Алигиери. И од Фиренца ги прати случувањата во баварскиот клуб. Јасна му е ситуацијата со Лирој Сане кој по враќањето од повредата не е истиот.
„Не е лесно човек да се врати по една повреда како таа на Сане. Но, на терен мора да даде сѐ од себе. Доколку успее 60 минути да одигра на врвно ниво, нема ништо лошо во тоа да отиде до кај тренерот и да му рече дека е време да го замени. Тоа не е знак на слабост, туку на сила. Верувам во Лирој бидејќи е млад и има талент. Играчи како Кингсли Коман и Серж Њабри се веќе некое време во Баерн, ја познавам клупската филозофија повеќе од нив“, додава Французинот.
„Лирој ги покажа своите квалитети во Манчестер Сити, каде имаше и поголема конкуренција. Четворицата латерални напаѓачи на Баерн треба да си помагаат еден на друг. Да се биде на клупа не е проблем бидејќи дури и за 20 минути на терен може да се направи разлика“, смета тој.
