Истражувачи од Австралија и од Нов Зеланд го претставија првото детално гледиште за молекуларен механизам со кој некој вид риби го менуваат полот. Припадници на околу 500 видови риби можат да го променат полот кога ќе пораснат и кога тоа го бараат околностите.
Со истражувањето на еден вид тропски риби чии женки можат да станат мажјаци, откриено е дека промената на полот најверојатно е покрената од стрес. Се наведува дека стресот влијае на тоа да се исклучат првобитните женски гени на рибите, а да се вклучат нови, од машки пол.
Процесот бара целосно репрограмирање на генетските информации на рибата.
Истражувачите наведуваат дека промената на полот се одвива брзо, женката го менува однесувањето за неколку минути до неколку часа. За осум до 10 дена станува мажјак.
Станува збор за риби кои живеат под заштита на еден мажјак. Доколку се случи нешто и мажјакот го снема, неговата улога ја презема најголемата женка која ги менува боите за само неколку часа и се претвора во мажјак за 10 дена и може да произведува сперма.
„Со децении е мистерија како полот може толку спектакуларно да се менува. Гените не се променети, така што најверојатно постојат сигнали кои ги вклучуваат или исклучуваат модификациите“, вели професорката Џени Грејвс.
Истражувањето е објавено во списанието Science Advances.
