Вести

Ричард Бренсон му дише во врат на Елон Маск: Одиме во вселената за неколку недели

9. октомври 2018 - 14:33 | А.С.

Трката за освојување на вселената станува сѐ потесна – основачот на Virgin Galactic, сер Ричард Бренсон, рече дека има само уште неколку недели до првото патување во вселената на неговата компанија.

„Очекуваме да бидеме во вселената за неколку недели, не месеци. А потоа и јас ќе бидам во вселената за неколку месеци, а не години“, изјави основачот и главен извршен директор на Virgin Galactic за CNBC.

Тој додаде дека испраќањето приватни патници во вселената ќе биде многу набрзо после тоа.

Со овој потег, Бренсон му стави до знаење на могулот Елон Маск од SpaceX дека не само што му дише во врат во трката за освојување на вселената, туку дека планира и да го претекне во намерата да испрати патници во вселената.

Бренсон ја основа Virgin Galactic во 2004 година и компанијата првично најави дека ќе понуди летови во вселената за туристи на почетокот на 2009 година.

Меѓутоа, одложувањето на плановите и фаталната несреќа во 2014 година ги зауздаа првичните амбиции на сер Ричард.

Во почетокот на годинава, Virgin Galactic успешно изведе суперсоничен тест лет со ракетата SpaceShipTwo со патничка кабина, за прв пат по несреќата.

67-годишниот мултимилионер во интервју за програмата You and Yours на BBC Radio 4 рече дека оди на обука за астронаут.

„Во просторија со десет луѓе, осуммина од тие 10 би сакале да одат во вселената кога би можеле да си го дозволат тоа“, рече Бренсон за CNBC.

Ваквите изјави на Бренсон следат непосредно откако ривалот SpaceX го откри првиот приватен патник што ќе го испрати на пат околу Месечината.

Таа мисија на Маск е планирана за во 2023 година и тоа ќе биде прво патување на Месечината со човечки екипаж од 1972 година наваму.

Основачот на Amazon Џеф Безос реле дека неговата компанија за патување во вселената Blue Origin ќе лансира мисија во вселената до 2019 година, но не нагласи дали со стручен екипаж или со патници кои, најверојатно, ќе платат „солени“ карти за тоа патување.

Коментирај