Поп-дивата Ријана и човекот кој ја освои 2017 година на музички и филмски план, Доналд Гловер, беа фотографирани на Карибите, каде се верува дека го снимаат нивниот заеднички филм со работен наслов „Guava Island“.
Иако засега нема детали околу филмот, се шпекулира дека дел од актерската екипа ќе бидат британскиот актер Нонсо Анози, како и Летиша Рајт, која се појави во боксофис хитот „Black Panther“.
Режисер на филмот во најава е Хиро Мураи, кој стана познат откако го режираше спотот на Доналд Гловер (Childish Gambino) за песната „This Is America“ кој се појави во етер годинава. Неговиот работен однос со Доналд Гловер се прошири и во серијата „Atlanta“, каде во неколку епизоди се појави во режисерскатата улога.
За Ријана ова ќе биде уште една во низата филмски улоги кои пејачката ги доби во последниот период, откако претходно се појави во „Ocean’s Eight“, „Valerian“ и веќе подзаборавениот „Battleship“. Истовремено со филмот, американските медиуми велат дека Ријана работи на два нови албуми, кои би требало да бидат промовирани пред крајот на 2018 година.
„Ријана не е среќна со реакциите кои ги доби за нејзиниот последен албум – иако ѝ се допаѓа како испадна албумот, таа знае дека мора да се врати со многу подобар албум. Таа во моментов снима два албуми, едниот со песни кои би требало да ја вратат на врвот на топ-листите, а другиот со експериментални песни“, пишува американскиот Metro.
