Македонската фудбалска репрезентација 2024 година ја завршува на 67. место на ранг-листата на ФИФА, која денеска беше ажурирана.

Во однос на рангирањето објавено на 28 ноември, нема промени во првите 113 места, а причината е тоа што изминатиов период се одиграа многу малку натпревари. Во Европа никој не беше активен, како и нашите „Рисови“, а репрезентативен фудбал се играше само во Океанија и делови од Азија.
Македонија ги задржа освоените 1368,986 бодови и остана на 67. местои, што всушност е најдобар рејтинг годинава, но полош од 2023 која ја завршивме на 65-тото место.
Нема промени и во Топ 10 каде води актуелниот светски и јужноамерикански шампион Аргентина пред Франција, Шпанија, Англија, Бразил, Португалија, Холандија, Белгија, Италија и Германија.
How things stand in the #FIFARanking as 2024 draws to a close. 🎬
— FIFA World Cup (@FIFAWorldCup) December 19, 2024
На другата страна на ранкингот, на дното, останува Сан Марино и покрај историските резултати што ги постигна есенва. Пред него се репрезентации како Ангвила, Американски Девствени Острови, Британски Девствени Острови, Туркс и Кајкос, Бахами, Лихтенштајн, Гуам, итн., додека без рејтинг поради неактивност е Еритреја.