Обвинетиот Јордан Ристевски рече дека ја признава вината без закани, притисоци и уцени. Тој беше сам на судењето за насилството во Центар, откако адвокатот му го отфрли полномошното.
„Бидејќи прво рекол дека не е виновен, па се предомислил, обвинетиот Ристевски постапувал слично како Томислав Лазаров кој призна вина. Тој е обвинет дека е еден од главните поттикнувачи на насилството. На врвот од овој настан по одговорност е Никола Груевски“, рече обвинителката Фатиме Фетаи.
Олеснителни околности се што Ристевски не е претходно осудуван, а се покаја и за направеното дело. Станува збор за високообразован и млад човек, вработен, личност која не е склона кон извршување кривични дела.
Отежителна околност, пак, е пораката пратена од настанот, која беше дека со насилство може да се спречи нормалното функционирање на државните органи. Обвинителката Фетаи побара судот да ги земе предвид сите околности.
„Ветувам дека веќе нема да го сторам делото“, рече обвинетиот. Пресудата ќе биде објавена утре.
Во случајот „Насилство“ се обвинети Никола Груевски, Миле Јанакиески, Даниела Рангелова и уште 10 лица за насилство пред Општина Центар во 2013 година. На претходното судење судијката одлучи да се раздвои постапката за обвинетиот Димче Крстев, кој беше донесен во судот со полиција бидејќи, како што рече, немал адвокат, а се пожали и на здравствени проблеми.
