Пандев веќе го нема, па нов капитен на фудбаслската репрезентација е Стефан Ристовски кој денеска ја одржа и првата прес-конференција во новата улога.
„Дали сум почитувам од другите играчи, не знам, се надевам“, низ смеа вели Ристовски.
Стефан и претходно често ја носел капитенската лента кога Пандев бил отсутен, но сега ситуацијата е поинаква, сега тој е првиот капитен, а некој друг ќе ја има неговата улога на заменик-капитен.
„Сакам јавно да му се заблагодарам на Горан Пандев кој има многу дадено за оваа репрезентација и е вистински пример како треба сега ние останатите да продолжиме понатаму. Голема чест ми е што сум капитен на репрезентацијата и што го заменувам него. Исто така, голема благодарност до селекторот кој ми ја даде довербата да бидам предводник“, вели новиот македонски капитен.
„Треба сите да бидеме пример како се носи репрезентативниот дрес, и на терен и надвор од него. Верувам дека ќе даваме максимум за својата држава. Фудбалската игра дојде до таков степен што немаме многу време да се запознаваме, да размислуваме. Има доста промени, но сите сме доволно професионални за да можеме да продолжиме онаму каде што застанавме“, додаде тој.
„Македонија доаѓа од Европско првенство, без разлика на неосвоените бодови. Ова треба да ни биде голем поттик за тоа како треба да се однесуваме“, заврши капитенот кој на клупско ниво ги брани боите на загрепски Динамо.
Македонија вечерва ќе го одржи полседниот тренинг, а утре од 20:45 на арената „Тоше Проески“ ќе го одигра прилично важниот квалификациски натпревар птротив Ерменија. Присуство на публика е дозволено, но согласност владините мерки, а картите се веќе во продажба.