Латералниот бек Стефан Ристовски е претпазлив во очи саботниот дуел со Ерменија на пладневното скопско сонце.
„Помина доста долг период, треба сега да се почне од почеток, да се рестартира сѐ, да се потсетиме на некои стари идеи, стари анализи. Сепак, навистина мина долг период, ни изостана репрезентацијата. Тука сме, еве полека почнуваме, треба време за да се стабилизираме. Се надевам на позитивни резултати“, почнува новопечениот заменик-капитен на лисабонски Спортинг.
Македонија в сабота од 15 часот во Скопје ја пречекува Еременија во 1. коло од новата сезона на Лигата на нации. Три дена подоцна гостуваме кај Грузија.
„Не сакам сега да си ставаме некоја улога на фаворит затоа што оваа корона малце ги поремети брзините, така да како што реков, долг период помина, се наоѓаме во припремна фаза, вратени сме од клубовите, а првиот натпревар го играме попладне во 3 што е стварно нелогично. Но, како за нив, така и за нас. Ни треба адаптација. Денес се собравме после долго време сите заедно, полека, полека. Прво мислиме на Ерменците, па после со Грузија“, смета Стефан.
Ристовски не сака да ја прифати улогата на Македонија како фаворит против Ерменија. Во некое друго време не би било така, но паузата поради коронавирусот, како што вели, малку го поремети фудбалот.
„Не би се ставил како фаворит, затоа што, како што реков, фудбалов се поремети поради ковидот, така да треба секако да сме спремни“, заврши тој.
