Фудбалерите на Ривер Плата пред преполниот Ел Монументал, со овации и огномет конечно ја прославија титулата од Копа Либертадорес, која ја освоија на 9 декември против нивниот најголем ривал, Бока Јуниорс.
На стадионот на Ривер Плата се собраа околу 60.000 гледачи, веднаш откако екипата се врати од Обединетите Арапски Емирати, каде учествуваше на Светското клупско првенство. Оттаму се вратија со освоено трето место, но прославата беше организирана поради триумфот во Копа Либертадорес.
Играчите излегуваа на терен еден по еден и добиваа овации од публиката, а нив ги предводеше тренерот Марсело Гаљардо.
Како дел од прославата беше и обраќањето на поранешниот член на Валенсија, Енцо Перез, кој во жешката атмосфера пееше „минута молчење за Бока бидејќи таа е мртва“. Тоа предизвика ерупција на стадионот, но аргентинските медиуми не го прифатија позитивно овој потег на играчот.
Откако Ривер Плата одигра 2:2 на првиот натпревар од финалето, вториот натпревар беше одложен поради немирите кои ги предизвикаа навивачите, па мораше да се одигра во Мадрид. Таму, Ривер Плата успеа по продолженијата да триумфира со 3:1 и да им ја донесе на навивачите најголемата радост со освојувањето на Копа Либертадорес.