Ракометниот суперлигаш Пролет го реши голманското прашање за новата натпреварувачка сезона потпишувајќи договор со црногорскиот голман Данило Михаљевиќ.
Михаљевиќ ги мина изминатите денови во Скопје, по што го стави својот потпис на едногодишниот договор со Тинекс Пролет, со можност за дополнително продолжување на соработката. Михаљевиќ има настапувано за неколку црногорски екипи, но исто така и во неколку клубови во странство, како Пореч од Хрватска, Железничар 1949 од Ниш (Србија), Сетубал од Португалија и Пјотрковија од Полска. Тој доаѓа за да го засили тимот по заминувањето на Јане Цветковски и ќе го сочинува голманското трио заедно со Андреј Петковски и со Матеј Ивановски.
Овој 25-годишен чувар на мрежата родум од Цетиње има зад своето име настапи за сите младински селекции, како и за сениорската репрезентација на својата татковина.
Данило Михаљевиќ е третото значајно засилување за тимот од скопската населба Пролет, по ангажманот на македонскиот репрезентативец Томи Јагуриновски и на Александар Василевски, а од клубот најавија дека во наредниот период се очекува дополнително засилување на играчкиот кадар за наредната сезона.