Роберт де Ниро, едно од најпрепознатливите лица во Холивуд, е познат по класиците како Raging Bull и Taxi Driver, како и по неодамнешните филмови како The Irishman.
Во текот на својата кариера, Де Ниро ги постигна најзначајните дела во соработка со Мартин Скорсезе, еден од најголемите американски режисери.
„Скорсезе како режисер има многу јасна визија кога станува збор за режијата и го режира филмот во насока за која верува дека е правилна. Покрај тоа, тој секогаш им дава голема поддршка на актерите. Мислам дека имав среќа што работевме заедно толку многу пати, секој пат ми беше задоволство“, изјави Де Ниро во интервју од 2015 година, пренесува Far Out Magazine.
Актерот почна да соработува со индустриски великани како Брајан Де Палма уште во 60-тите, пред да ја започне својата соработка со Скорсезе во 70-тите. Нивното партнерство резултираше со иконски филмови како Taxi Driver.
За време на истото интервју, Де Ниро беше замолен да го издвои својот омилен филм и улога досега. Не можеше да понуди само еден одговор.
„Не сакам да бирам еден најдобар филм, не се чувствувам удобно да го правам тоа“, истакна тој. Но, по инсистирањето на новинарот, тој рече дека еден проект за него има посебно значење: „Не мора да е најдобар, но е филм кој многу ми значи“.
Филмот за кој зборуваше е Everybody’s Fine од 2009 година, римејк на италијански филм од 1990 година.
„Режијата е на Кирк Џонс. Станува збор за татко кој е отуѓен од своите деца и тргнува на патување за повторно да се поврзе со нив“, рекол Де Ниро. Иако филмот не беше комерцијален успех и беше критикуван дека е уште едно божиќно клише, актерот е горд на своето учество и ја издвои улогата во тој филм како негова омилена.
И покрај критиките, изведбата на Де Ниро во филмот доби пофалби и овој проект остана важен дел од неговата кариера.
