По откажувањето на Бен Афлек, наметката на Бетмен чекаше некој што ќе ја облече за идните филмови со „темниот витез“. А како што стојат работите, тоа ќе биде Роберт Патинсон – ѕвездата од популарната тинејџерска сага „Twilight“.
Според извештајот на Variety, Патинсон е првиот избор за главната улога во претстојниот филм за Бетмен во режија на Мет Ривс, кој би требало да ја доживее премиерата на 25 јуни 2021 година.
Претпродукцијата на филмот „The Batman“, чија премиера е закажана за 2021 година, се очекува да започне летово. Бен Афлек до скоро ги имаше режисерската и главната улога во овој филм, но реши да се откаже од проектот. Мет Ривс („Dawn of the Planet of the Apes“) седна на режисерското столче, а изгледа дека Роберт Патинсон ќе се појави во улогата на заштитникот на Готам, Бетмен.
Покрај Патинсон, во конкуренција за улогата се најдоа уште неколку актери од помладата генерација. Како сериозен кандидат се наметна и Николас Хоулт („Mad Max: Fury Road“), но од Variety тврдат дека иако тој влегол во потесниот круг на потенцијални актери, сепак Роберт Патинсон е првиот избор за улогата.