Роберт Патинсон во ново интервју за Deadline откри дека снимањето на филмот The Batman Part II, во режија на Мет Ривс, ќе започне дури кон крајот на 2025 година.
Актерот во 2022 година за прв пат го отелотвори популарниот суперхерој Бетмен, а неговата изведба ги воодушеви обожавателите на стриповите.
Патинсон за време на премиерата на својот најнов филм, научно-фантастичната црна комедија Mickey 17, изјави дека не може да зборува за деталите од заплетот на новиот Batman, но за филмот рече дека е „кул, навистина кул“.
#Mickey17 star Robert Pattinson on shooting #TheBatman sequel at the end of this year: "It's cool" pic.twitter.com/uencAfmEBN
— Deadline (@DEADLINE) February 13, 2025
Веста за почетокот на снимањето беше објавена кратко откако Warner Bros. соопшти дека премиерата на филмот The Batman Part II е одложена од 2 октомври 2026 година на 1 октомври 2027 година. Филмот беше најавен уште во април 2022 година, кога беше потврдено дека во продолжението ќе глумат ѕвездите од првиот филм: Патинсон, Енди Серкис, Џефри Рајт и Колин Фарел.
Ривс претходно изјави за медиумите: „Работиме на тоа приказната да продолжи таму каде што застана и на нешто за кое се надевам дека навистина ќе ги изненади гледачите.“
Првиот филм од франшизата на Ривс беше голем хит, а во кината заработи речиси 800 милиони долари. Критичарите му дадоа позитивни оценки и подоцна беше номиниран за три Оскари.
Што се однесува до Патинсон, неговиот филм Mickey 17 во кината ќе можеме да го гледаме од 6 март. Следниот проект на актерот е филм за Одисеј во режија на Кристофер Нолан.
