Борбата со пожари и спасувањето на луѓето од овие ситуации е секогаш опасна задача, без разлика дали се работи за запалени згради или шумски пожари. Сепак, пожарникарите ќе добијат вредна помош.
Одредени компании и тимови од научници работат на развој на роботи кои можат да пребаруваат запалени згради пред да влезат пожарникарите, а меѓу тие роботи е и FireBot.
Станува збор за робот со далечински управувач кој може да издржи температури до 650 степени и може да работи до 4 часа непрекинато. Дизајниран е во форма на кутија и се движи со помош на траки и може да надмине различни пречки. Роботот користи безжична технологија MIMO која му овозможува да испраќа податоци до приемник оддалечен до 1,5 километар. На тој начин, човек може безбедно да истражува запален предмет додека го контролира тој робот со џојстик и гледа во екранот.
FireBot има сензори кои вклучуваат HD оптички и термални камери, како и различни механизми за откривање опасни гасови. Покрај тоа, може да открие и присуство на јаглерод моноксид и водород цијанид, два од најсмртоносните испарувања кои дури можат да убијат луѓе. Роботот се движи двојно побрзо од пожарникар кој носи костум и целосна опрема.
FireBot се очекува да се продава по цена од 90.000 долари кога ќе започне да се продава подоцна годинава.
