Седумгодишно момче е повредено во шаховски дуел кој го играло против робот за време на турнир што се одржувал во Москва.
Организаторите соопштија дека несреќата се случила кога момчето се обидело пред време да го изигра својот потег. Иако прстот му бил скршен, младиот шахист сепак го завршил натпреварот. Сепак, неговите родители сега подготвуваат тужба.
„Роботот му го скрши прстот на момчето и тоа е очигледно лоша работа. Момчето направи потег, но требаше да му даде време на роботот да одговори. Сепак, тој побрза и роботот го фати“, изјави Сергеј Лазарев, претседател на Московската шаховска федерација.
Роботот не е во сопственост на Федерацијата, туку се изнајмува по потреба. Операторите очигледно во безбедносните протоколи ја занемариле оваа можност.
„Овој робот игра шах 15 години и ова е единствениот инцидент на кој се сеќавам. Тој е апсолутно безбеден, но талентираниот пронаоѓач треба да инсталира дополнителни безбедносни протоколи. Момчето е добро“, додаде заменикот на Лазарев, Сергеј Смагин.
