Идејата за роботи-убијци ни беше всадена во главата преку холивудските филмови како „Terminator“ и „RoboCop“, но денес таа не изгледа толку далечна како во 90-те години, кога ваквите филмови беа во екот на популарноста. Кои се шансите дека роботите-убијци би можеле да претставуваат закана за човештвото и дали оваа закана може да биде запрена?
Сер Најџел Шадболт, професор по компјутерска наука на Универзитетот од Оксфорд, вели дека вештачката интелигенција (AI) ќе донесе големи придобивки за човештвото, револуционизирајќи ја дијагнозата и третманот за рак и трансформирајќи го образовниот и работниот систем. Ако се појават проблеми, вели тој, тие нема да бидат причинети од „бунт“ на роботите како во холивудскиот хит „Terminator“.
„Јасно е дека опасноста не е причинета од роботи кои решиле дека треба да се побунат против луѓето и тргнале во роботска револуција. Ако постојат роботи-убијци, ќе биде поради тоа што ние луѓето сме биле доволно глупави за да им дадеме такви инструкции во софтверот, без да им биде потреба човечка дозвола“, вели Шадболт.
Тој ја даде оваа изјава пред да говори на конференцијата CogX во Лондон, пред огромен број луѓе од истата индустрија. Со него се сложија скоро сите, а посебно германскиот пионер во модерно машинско учење, Јирген Шмидхубер, кој целосно ја отфрли идејата за пропаст на човештвото преку роботска апокалипса.
„Филмската индустрија знае како да ви всади такви идеи во главата, но заплетите на ваквите филмови се многу смешни и нереални“, рече Шмидхубер.
Претходно и Елон Маск предупредуваше дека вештачката интелигенција претставува голема закана за човештвото, посебно ако таа остане неконтролирана од човечки фактор. И не само тоа, туку и понатаму постојат сомнежи дека роботите и вештачката интелигенција ќе придонесат кон намалување на работните места за луѓето.
Сепак, научниците уверуваат дека луѓето се многу попаметни од тоа и секогаш ќе најдат некоја нова гранка каде ќе можат да бидат отворени работни места. Од медиумите, преку реални шоуа, туристички позиции и социјална грижа, професиите секогаш еволуираат во нешто ново.
Шадболт вели дека нема потреба да се плашиме од роботска апокалипса бидејќи единствениот начин таа да се случи е ако се случи човечка грешка која ќе заборави да го програмира роботот (или AI) да ги слуша наредбите на луѓето. Во спротивно, вели тој, од роботите ќе имаме само придобивки.
