Тајванската компанија Foxconn, која произведува делови за Apple и за Samsung, отпушти 60.000 работници во една фабрика во Кина, и ги заменила со роботи.
Фабриката на Foxconn во кинескиот регион Куншан, го намали бројот на вработени од 110.000 на 50 илјади, благодарение на воведувањето на роботите.
Од тајванската компанија потврдија дека најголемиот дел на производството е автоматизиран, но дека тоа не значи долгорочно губење на работни места.
Foxconn покажа желба за зголемување на автоматизацијата, но и за значително задржување на работната сила во Кина.
„Користиме роботски инженеринг и други иновативни производствени технологии кај работите кои се повторуваат, а низ тренинг им овозможуваме на нашите вработени да се фокусираат на елементите на додадена вредност во процесот на производство“, се наведува во соопштението на тајванската компанија.
Во последните неколку години, кинеските фабрики инвестираа големи пари во роботика, а од септември 2014 година, повеќе од 500 фабрики во покраината Гуангдонг потрошија речиси 630 милиони долари на роботи.
Економистите предупредуваат на сериозни последици од автоматизацијата на пазарот на труд, порачуваат дека во наредните две децении 35 отсто од работните места може да исчезнат, според студијата која ја спроведе компанијата Deloitte во соработка со Универзитетот Оксфорд.