За индустријата за роботика, корона-кризата е одлична прилика, а така размислуваат и во компанијата Hanson Robotics во Хонгконг.
Можеби ова име не ви значи премногу, но ова е компанијата зад веројатно најпознатиот хуманоиден робот во светот - Софија, која, меѓу другото, се прослави со изјавата дека луѓето треба да бидат уништени.
Основачот и прв човек на компанијата, Дејвид Хансон, изјави за странските медиуми дека светот ќе биде поинакво место по COVID-19, каде што некои работи ќе се променат, а една од нив е потребата за повисоко ниво на автоматизација.
Можностите што им се отвораат на роботите се големи, а самата Софија вели дека роботи како неа можат да се користат во здравството, но и за грижа на стари лица и болни.
Хансон вели дека неговите роботи се уникатни бидејќи навистина изгледаат како луѓе: Ова може да биде многу корисно во овие времиња кога луѓето се чувствуваат осамени и социјално изолирани.
Јохан Хорн, професор по социјална роботика, кој исто така ја има проучувано Софија, се согласува. Тој вели дека иако самата роботика е сè уште во почетна фаза, пандемијата навистина може да ја зголеми врската помеѓу луѓето и роботите.
Сепак, здравството е само една од индустриите во кои роботите можат да помогнат, па Хансон најави производство и продажба на илјадници роботи, „големи и мали“, за различни сфери на деловно работење - од авијација до малопродажба.
Еден од новите роботи што ги развиваат е Грејс, која ќе се појави на пазарот оваа година, а ќе биде наменета за здравствениот сектор.