Мајките, односно родителите на деца до 10 години се ослободени од работа и верувам дека овој административен проблем може да се реши, рече на денешната прес-конференција министерот за здравство Венко Филипче, одговарајќи на новинарско прашање во однос на градинките за родители кои реагираат – мајки на кои породилното им завршило пред да се воведе вонредната состојба, не ги запишале децата во градинка и не можат да земат потврда и мораат да одат на работа.
„За ова неколкупати разговараме уште на почетокот на кризата затоа што уште тогаш имаше родители кои имаа ваков пример, така што административните служи во градинките и во останатите институции кои не функционираат работат. Тоа беше случај и за уписот за следната година. Така што не би требало да претставува проблем и за ова можам да го консултирам МИОА дали се работи за нешто што е проблем на терен или е некакво недорабирање“, истакна министерот Филипче.
„Ако не сфатиме дека уште долго ќе живееме со вирусот, ќе се соочуваме и понатаму со нови случаи и нема да го стопираме ширењето на вирусот. Многу од економските оператори не работат и трпат загуби, градинките не работат бидејќи сакаме да ги заштитиме децата. Заврши и училишната година за да нема групирања и апелирам до родителите да им укажат на децата дека треба да носат маска и да не се групираат“, рече претходно Филипче.
